لبيه يا للي لاجل عينك ألبي
يرخص لك الغالي حبيبي و أجيبه
امرك حبيبي امر سامي لقلبي
و القلب ما يعصى أوامر حبيبه
امر تدلل يا حياتي و حبي
ياللي غمر قلبي بعطفه و طيبه
يا الذ نكهة في طعامي و شربي
لك قدر غالي فوق راسي و هيبة
لو غبت عن عيني دموعي تصبي
فرقاك بالدنيا لي اكبر مصيبة
و أنسى همومي يوم ألقاك جنبي
انت أمل عمري و غاية نصيبة
و انت دوى جرحي حبيبي و طبي
انت الوحيد اللي لقلبي طبيبة
و اللي تبيه يا زين حاضر و ألبي
و يوم التلاقي قادر الله يجيبه
شعر / مصبح قاسم ابو عبدالله
